Гурбан дангинанар - Агаhаа уг гарбалтай

Буряад гоо hайхан басагадай «Дангина» мүрысөөндэ Улаан-Үдэ хотын бэеын тамирай- спортын байшан соо хоёр үдэрэй туршада Монгол ороной, Хитадай Үбэр Монголой, Забайкалиин хизаарай, Эрхүүгэй можын, Буряад ороной - хамта 23 басагад хабаадаhан байна.
«Краса России» гэhэн бүхэроссиин ниитын хүдэлөөнэй Буряад республикын региональна директор, жю¬риин түрүүлэгшэ Руфина Уюина, «Мисс монгольских наций-2016», «Краса Буря¬тии-2015», «Мисс Азия Альма Матер-2012» нэрэ зэргэтэй Арюна Бубеева, Бүгэдэ буряа¬дай үндэhэн соёлой эблэлэй түрүүлэгшын орлогшо, Агын Буряадай автономито тойрогой соёлой габьяата ажалтан Рыгзын Цыдендоржиев, Монголой ба Хитадай түлөөлэгшэд - Ок¬тябрь ба Номин, Россиин Федерациин hуралсалай хүндэтэ ажалтан Анна Базарова гэгшэд жюриин ажал ябуулжа, баса¬гадай бусадhаа ондоогоор өөрыгөө харуулха, буряад хэлээ, ёhо заншалнуудаа мэдэхэ, дуу, хатар гүйсэдхэхэ шадабаринуудыень сэгнэhэн байна. Тус конкурсын гол зорилгонууд гэбэл, буряад ара¬дай заншалта соёлдо, хэлэ шудалалгада, уран бүтээлдэ, гоё hайханиие сэгнэлгэдэ залуушуулай анхарал хандуулга, тиихэдэ зохёохы hэдэбтэй залуушуулай дундаhаа шэнэ нэрэнүүдые тодоруулга, залуушуулай зохёохы эрмэлзэл урмашуулга, гүйсэдхэлгын арга шадал hайжаруулга болоно бшуу. «Магтан дуулая угаа, нютагаа», «Сэдьхэлэй баяр», «Аялга дуумни», «Һаргама толон» гэhэн янзануудаар баса¬гад өөhэдыгөө дүрбэн талаhаа харуулаа.
Энэ мүрысөөндэ илажа гараhан гоо hайхан дангинанар булта Агын тойрогhоо уг гар¬балтай байба: Забайкалиин хи¬заарай Агын тойрог түлөөлhэн Юлия Ринчинова Агын аймагай Үбэр Аргали нютагай, Улаан-Үдэ хото түлөөлhэн Цырегма Лубсанова - Дулдаргын айма¬гай Табтаанайн, Эрхүүгэй можо түлөөлhэн Дарима Урбаевагай эжынь Могойтын аймагай Сагаан Шулуутайда тоонтотой юм. Буряад ороной соёлой министр Тимур Цыбиков эдэ гурбан басагадта лауреадай дипломуудые, тус тустань 58 мянган түхэриг, уран гартан Эржэн Буиновагай бүтээhэн, урда таладаа торгон утаhаар «Ом маани бадмай хум» гэжэ hиилээтэй, ара таладань хуушан монгол бэшэгээр «Алтаргана» гэжэ, мүн буряадаар “Илагшада” гээд бэшээтэй, хамба лама Даши-Доржо Итигэловэй ордондо рамнайлагдаhан зурагуудые барюулаа юм. Монгол ороной Улаан-Баатарай Менхчимэг ба Хитадай Хүлэн-Буир аймагай Сэрэн Баатарай Балжин «Краса России» хүдэлөөнэй зүгhөө тусхай шангуудаар урмашуулагдаа бшуу. Мун Сахюуртын Светлана Лхамацыренова, Догойн Галсана Баясхаланова, Зүдхэлиин Арюна Доржиева, Амидхаашын Алтана Жамьянова баhал олондо үнэхөөрөө hайшаагдаа гэжэ тэмдэглэмээр. Хабаадаhан бүхы басагадта баталамжанууд барюулагдаа.
Цымжидма Цымпилова. Гурбан дангинанар - Агаhаа уг гарбалтай// Толон.-2016.-15 июля (28).-С5