Арадай дуунай гое гээшэнь…
Буряад арадай дуу гүйсэдхэгшэдэй конкурс Буряадай академическэ оперо ба баледэй театрай ордон соо эмхидхэгдээ. Тэндэ 100 гаран хабаадагшадай зэдэлүүлhэн арадай hайхан дуунууд 2 үдэрэй туршада замхаагүй.
Энэ мүрысөөн хадаа буряад арадай дуунуудые дэлгэрүүлжэ, дуушадые элирүүлжэ, бэлиг шадабарииень hайжаруулха зорилготой юм. Мүрысөөнэй гуримаар хабаадагшад наhанай 4 бүлэгтэ хубааржа, дуунуудаа гүйсэдхөө. Мүн тиихэдэ мүрысөөн 2 шатаар үнгэрөө.
СССР-эй арадай артистка Галина Шойдагбаева (жюриин түрүүлэгшэ), Монгол ороной габьяата зүжэгшэн ба артист Дамдинжабай Долгормаа, Бүгэдэ буряадай «Алтаргана-2014» наа¬данай алтан медальда хүртэгшэ, Хитадай Үбэр Монголой Ажалай Баатар, Монгол Уласай соёлой габьяата ажаябуулагша, Хайлар хотын соёлой урлалай дээдэ hургуулиин багша Согтын Должин, Буряад Уласай габьяата зүжэгшэн, Усть-Ордагай Буряа¬дай тойрогой соёлой габьяата ажаябуулагша, Агын Буряадай автономито тойрогой соёлой габьяата хүдэлмэрилэгшэ, дуу¬най багша Татьяна Галсанова, Агын Буряадай тойрогой соёлой габьяата хүдэлмэрилэгшэ, Агын К.И. Базарсадаевай нэрэмжэтэ уран урлалай hургуулиин багша Баира Гомбожапова, П.И.Чайковскиин нэрэмжэтэ урлалай колледжын багша, соё-
лой габьяата хүдэлмэрилэгшэ, Хүндэлэлэй тэмдэгэй орденой кавалер Вячеслав Елбаев гэгшэд мүрысөөнэй дүнгүүдые татаха гэhэн харюусалгатай,
бэлэн бэшэ ажал ээм мүрэ дээрээ ашаа.
Түрүүшын шатада хабаадагшад тайзан дээрэhээ хүгжэмэй зэмсэгтэй хоолойгоо ниилүүлэн дуулаа, удаань үшөө нэгэ дуу хүгжэмэй зэмсэгэй үдэшэлгүйгөөр зэдэлүүлээ. Эндэ «Абай Гэсэр», «Аба эжын захяа», «Наян Наваа», «Унагша моримни» гэхэ мэтэшэлэн дуунууд ханхинаа юм. 2-дохи шата дабажа гараhан хабаадагшадай тоо 42 болоод байба.
Ирагуу hайхан, ханхинама, үгышье hаа бүдүүнээр дуулаhан хоолойтой дуушад дуу гүйсэдхэжэ, харагшадай зүрхэ шэмшэрүүлэн абана. Харагшад танил дуунай зэдэлхэдэ, хабаадагшатай нэгэ амин дээрэ адлихан дуулалсажа байгаа. Аянгаяа татажа шадаhан хабаадагша дуугаа томо ордоной танхим соо дүүрэн тэгшэ сууряатуулан, харагшадай hайшаалда хүртэнэ.
Элинсэг хулинсагнай эдэ дуу¬нууд доро мүндэлжэ, дуунай мүрнүүдые зүрхэ сэдьхэлээрээ мэдэржэ, аянгалан зэдэлүүлжэ үндыhэн ха юм. Аба эжынэрэйнгээ баян буряад хэлэн дээрэ зохёогдоhон удхатай дуунуудые мартаагүй hэргээжэ байхада, ямар гоё гээшэб!
Валентина Цыренжапова. Арадай дуунай гое гээшэнь…//Толон.-2016.-8 июля (№27).-С.4