Оршон үеын буряад дуунууд
Оршон уеын буряад дуунуудай мүрысөөндэ Монголой, Шэнэхээнэй, Буряад ороной, Эрхүүгэй, Москвагай, Агын Буряадай тойрогой - дүн хамта 135 дуушад хабаадаа юм.
Жюриин түрүүлэгшээр оршон үеын буряад дуунай одон, Нонна ба Зоригто Тогочиевуудай театрай хүтэлбэрилэгшэ З.Тогочиев баталагдаhан байгаа. Тэрээнтэй хамта Буряад ороной мэдээжэ дуушан, Улаан-Үдын Чайковскиин нэрэмжэтэ урлалай колледжын багша Е.Борохитова, Эрхүүгэй можын Усть-Ордагай Буряадай тойрогой «Талын аялга» дуу ба хатарай бүлгэмэй гол дуушан Б.Билязова, Хитадай арадай дуушан А.Нумаа, Монголой искусствын габьяата хүдэлмэрилэгшэ, композитор Б.Долгёон, Агын аймагай захиргаанай соёлой, тамирай ба залуушуулай политикын хорооной консультант И.Саганова гэгшэд сэгнэлтын ажал ябуулаа.
Оршон үеын буряад дуунуудай мүрысөөн гурбан янзаар эмхидхэгдээ. Нэгэдэхи «Оршон үеын буряад дуу гүйсэдхэгшэд» янзада хабаадагшад хоёр наhанай бүлэгтэ хубааржа (16 наhан хүрэтэр ба 17-hoo дээшэ наhанай), хабаадаа бшуу. Тиин 16 наhан хүрэтэр оршон үеын буряад дуу гүйсэдхэгшэдэй дунда бүхыдөө 19 үхибүүд оролсоо. Бишыхан үхибүүдэй буряад hайхан заншалаа hэргээн, хүндэлэн, абьяас талаантайгаар, гүйсэдхэхы шадабаритайгаар дуу хүгжэм зэдэлүүлхэдэнь, сэдьхэл доhолгомо, урма баяртай байгаа. Тэдэнэй дунда эгээл эдир хабаадагша - Дулдаргын аймагай түлөөлэгшэ, 7 наhатай Базарсадо Николаев, Буряад ороной Арюна Мункуева ба Монголой Д.Маргад дуушад түрүүлээ. Тиигээд 17-hоо дээшэ наhанай бүлэгтэ дүн хамта 36 дуушад байгаа. Тиин Агын аймагай түлөөлэгшэ Мунко Батомункуев, Улаан-Удын Ирина Шагдурова ба Сэлэнгын аймагай Дугар Бадмажапов гурбан эгээл эрхим дуушадай нэрэ зэргэдэ хүртөө.
«Оршон үеын буряад дуу зохёогшод» янзада 48 дуу хүгжэм хабаадаа. Тэндэ эрхим уран зохёолшо ба эрхим композитор элирүүлэгдээ. Жюриин согсолhон дүнгүүдээр, эрхим уран зохёолшын нэрэ зэргэдэ Агын аймагай түлөөлэгшэ Дугарма Батоболотова, Буряад ороной Баирма Борохитова ба Монгол ороной М.Маргаа хүртэhэн байнад. «Эрхим ком-
позитор» янзада Ивалгын аймагай түлөөлэгшэ Лудуп Очиров, Монгол ороной Б.Дэлгэр сэгнэгдээ. Мүн «Алтаргана» нааданай түүхэдэ түрүүшынхеэ нэгэ доро хоёр субъект - Агын тойрог ба Буряад орон түлөөлжэ, Дулма Сунрапова эрхимүүдэй тоодо ороо бшуу.
«Видеоклип» гэhэн янза анха түрүүшынхеэ "Алтарганын" программада  оруулагдаhан байна. Тэндэ  бүхыдөө 33 видеоклип хабаадаа. Аглаг hайхан Агын аймагай түлөөлэгшэ Дылгыр Ирдынеевэй «Абадаа» гэhэн уярмаар зохид дуутай клип түрүүлээ, 2-дохи hуури Захааминай аймагай Светлана Санжитова «Ерэхэ үбэл» дуугаараа эзэлээ, 3-дахи hуурида баhал Агын аймагай эрхим дуушан Александр Бороев «Эжы абам хайратай» гэhэн дуунай видеоклиптэеэ гараа. Бухы илагшад дээдэ шангай баталамжануудаар, Даши-Доржо Этигэлов хамба ламын ордондо рамнайлагдаhан бүтээлнүүдээр ба мүнгэн шангуудаар урмашууладаа.
Саяна Лодонова. Оршон үеын буряад дуунууд// Толон.-2016.-15 июля (28).-С.8